Search

Баба Яга з Дыпломам


Артыст народнага аматарскага тэатральнага калектыву «Прамень» Віталь Нікульчанка стварыў за гады працы ў Хоцімскім раённым Цэнтры культуры шмат яскравых запамінальных вобразаў. Але візітнай карткай акцёра можна ўпэўнена назваць ролю Бабы Ягі. Практычна кожны год у перыяд Навагодніх святаў Віталь пераўвасабляецца ў лясную вядзьмарку і з'яўляецца на дзіцячыя ранішнікі, канцэрты, спектаклі і іншыя імпрэзы. У яго выкананні Баба Яга гэта не злы персанаж, а хутчэй гарэзны і па-дзіцячы непасрэдны. Успамінаюцца радкі з казкі Леаніда Філатава «Сказ пра Фядота-стральца, заліхвацкага малайца», дзе Баба Яга сама сябе характарызуе: « …Ну, выпадкова, ну жартам, збілася з вернага шляху! Дык я ж - дзіця прыроды! Няхай благое - але дзіця!...»

У канцы снежня мінулага года ў Магілёве праходзіў абласны конкурс навагодніх гульнявых праграм «Куфар навагодніх цудаў», арганізаваны Магілёўскім абласным цэнтрам народнай творчасці і культурна-асветніцкай работы. У мерапрыемстве прынялі ўдзел і артысты з Хоцімскага РЦК. У тэатралізаваным інтэрактыўным паказе акрамя Бабы Ягі (Віталя Нікульчанкі) магілеўчан у надыходзячым Новым Годам віншавалі Дзед Мароз (Аляксандр Александрын), Снягурачка (Юлія Кавалёва) і два Снегавікі (Максім Мамчанка і Таццяна Кучанкова).
Журы конкурсу паглядзеўшы ўсе гульнявыя праграмы ўсіх раёнаў Магілёўшчыны назвалі лепшай праграму Хоцімскіх артыстаў. Але Дыплом за першае месца стаў не адзінай узнагародай. Арганізатараў конкурсу так уразіў і пакарыў вобраз Бабы Ягі ў выкананні Віталя Нікульчанкі, што яны пайшлі на адступленне ад рэгламенту і ўзнагародзілі артыста Спецыяльным Дыпломам «За яркі навагодні персанаж». Так што цяпер, Баба Яга з Хоцімска - афіцыйна дыпламаваны спецыяліст. І ўдвая прыемна, што новы 2022 год хоцімскія артысты пачынаюць з перамогі.

Аляксандр Александрын, метадыст РЦК ДУК «Цэнтралізаваная клубная сістэма Хоцімскага раёна».
7 views0 comments