Search

Дарогі памяці і славы пачынаюцца ў Хоцімску

Ад плошчы Леніна ў Магілёве стартаваў 25 красавіка абласны патрыятычны праект "Дарогамі памяці і славы". Нават па прыблізных дадзеных прадстаўленых у афіцыйных СМІ праводзіць аўтакалону, якая складаецца з трох стылізаваных аўтобусаў-музеяў і рэтрааўтамабіляў, палявой кухні і проста ўсіх жадаючых узяць удзел у сімвалічным аўтапрабегу сабралася каля 4 тысяч чалавек. Але пры ўсёй павазе Магілёў можна афіцыйна назваць толькі зыходным пунктам маршруту. А паўнапраўным пунктам старту праекта стаў наш гарадскі пасёлак Хоцімск. Самы ўсходні раённы цэнтр Беларусі. Але не толькі гэта стала вызначальным у выбары Хоцімшчыны як пачатку двухтыднёвага падарожжа па ўсіх 23 раёнах Магілёўскай вобласці агульнай працягласцю паўтары тысячы кіламетраў. На тэрыторыі нашага раёна знаходзіцца самы першы населены пункт Савецкай Беларусі вёска Малая Ліпаўка, вызвалены ў Чырвонай Арміяй 24 верасня 1943 года падчас наступальнай аперацыі "Баграціён". І як справядліва адзначыў старшыня Хоцімскага выканаўчага камітэта Міхаіл Куксянкоў, вітаючы ўдзельнікаў прабегу ў цэнтры Хоцімска, менавіта ад нашай зямлі ўзнялася вызваленчая хваля, якая ахапіла не толькі Беларусь, Украіну, Прыбалтыку, але і ўсю ўсходнюю Еўропу да самага Берліна.
Вядома, наш невялікі пасёлак з прычыны аб'ектыўных абставін не можа забяспечыць такі масавы сход жыхароў, як у Магілёве. Але сустракаць аўтакалону сабралася вялікая колькасць хоцімчан, прадстаўнікоў прадпрыемстваў і арганізацый, устаноў і грамадскіх аб'яднанняў раёна. Ад імя ўсіх удзельнікаў праекта з прывітальным словам да прысутных звярнуўся першы сакратар Магілёўскага абласнога камітэта грамадскага аб'яднання "Беларускі рэспубліканскі саюз моладзі" Уладзімір Паўлоўскі.
Далей хацімчане і госці гарадскога пасёлка прайшлі ў сквер каля брацкай магілы савецкіх воінаў, якія загінулі за вызваленне Хоцімскага раёна ад нямецка-фашысцкіх захопнікаў. Тут пасля нядоўгага мітынгу і ўскладання кветак адбылася перадача ўдзельнікам патрыятычнага праекта сімвалічнага мяшочка з зямлёй з воінскага пахавання з вёскі Малая Ліпаўка. Такія артэфакты каманда праекту будзе збіраць на працягу ўсяго маршруту. Зямля, сабраная з месцаў баявой славы Магілёўшчыны, будзе закладзена ў куфр на мемарыяле "Буйніцкае поле". А таксама Уладзімір Паўлоўскі і Міхаіл Куксянкоў пасадзілі ў скверы дрэвы новай алеі Памяці і Славы.
Галоўная мэта праекта "Дарогамі памяці і славы", прысвечанага 77-годдзю Вялікай Перамогі і году гістарычнай памяці, заключаецца ў згуртаванні як моладзі, так і ўсіх жыхароў Магілеўшыны на аснове гістарычных традыцый нашай Радзімы, супрацьстаянні спробам скажэння праўды аб ролі савецкага народа ў Вялікай айчыннай. вайне, папулярызацыі дасягненняў сучаснай беларускай дзяржаўнасці. І для дасягнення пастаўленай задачы плануюцца мерапрыемствы рознай накіраванасці і фармату. Гэта і мітынгі, і флэш-мобы, адкрытыя дыялогі запрошаных грамадскіх і палітычных дзеячаў, канцэртныя праграмы і спектаклі. У раённым Цэнтры культуры яшчэ да прыбыцця асноўнай каманды аўтапрабегу прайшоў спектакль “Песні Роднай Зямлі” паводле паэм “Медуніца” і “Марыйка” паэта Алеся Казекі, старшыні Магілёўскага абласнога аддзялення грамадскага аб'яднання “Саюз пісьменнікаў Беларусі”. Літаратурна-пластычная пастаноўка, як абазначылі жанр самі яе стваральнікі, падрыхтаваная студэнтамі тэатральнага аддзялення Магілёўскага дзяржаўнага каледжа мастацтваў, была прадстаўлена навучэнцам школ гарадскога пасёлка. Выступіў перад юнымі хоцімчанамі і сам аўтар.
Канцэртная праграма народных творчых калектываў Хоцімскага РЦК "Прамень", "Горліца", "Хлопцы Пасялковыя", "Пацеха", а таксама выхаванцаў Дзіцячай школы мастацтваў каманды мажарэтак і танцавальнага ансамбля "Мікс-дэнс" стала завяршальным мерапрыемствам. аўтапрабегу.
Раніцай наступнага дня аўтакалона адправілася па далейшым маршруце. Наперадзе ў актывістаў двухтыднёвае падарожжа, якое завершыцца ў Магілёве напярэдадні свята Вялікай Перамогі 9 траўня. А нам, хотимчанам, можна з гэтага часу з гонарам казаць, што дарогі памяці і славы бяруць свой пачатак ад Хоцімскай зямлі.

Аляксандр АЛЕКСАНДРЫН, метадыст РЦК ДУК "Цэнтралізаваная клубная сістэма Хоцімскага раёна"


10 views0 comments